ಗ್ರಾಮ ಪಂಚಾಯಿತಿಯಲ್ಲಿ ವ್ಯಾಪ್ತಿಯಲ್ಲಿ ಆಸ್ತಿಗಳಿಗೆ ಲಭ್ಯವಿರುವ ತೆರಿಗೆ ವಿನಾಯಿತಿಗಳು

ಗ್ರಾಮ ಪಂಚಾಯತಿ ಆಸ್ತಿ ತೆರಿಗೆ ವಿನಾಯಿತಿ ಮತ್ತು ಪ್ರಮುಖ ನಿಯಮಗಳು

ಕರ್ನಾಟಕ ರಾಜ್ಯ PDO B ಗ್ರೇಡ್‌ ಹುದ್ದೆ ಉನ್ನತೀಕರಣ ಸಂಘ (ರಿ) ಬೆಂಗಳೂರು ಅವರ ಸಮಘ್ರಹಿಸಿ ಸರಳಿಕರಿಸಿದ ಮಾಹಿತಿ

1. ತೆರಿಗೆಯಿಂದ ಸಂಪೂರ್ಣ ವಿನಾಯಿತಿ ಇರುವ ಆಸ್ತಿಗಳು (100% ರಿಯಾಯಿತಿ)

ಕೆಳಗಿನ ಆಸ್ತಿಗಳಿಗೆ ಗ್ರಾಮ ಪಂಚಾಯತಿ ತೆರಿಗೆಯಿಂದ ಸಂಪೂರ್ಣ ವಿನಾಯಿತಿ ಇರುತ್ತದೆ:

• ಸರ್ಕಾರದ ನಿಯಮದಡಿ ನಿರ್ಮಿಸಿದ ಕಟ್ಟಡಗಳು: ಕರ್ನಾಟಕ ಭೂ ಕಂದಾಯ ಅಧಿನಿಯಮ 1964ರ ಕಲಂ 95(1)ರ ಅಡಿಯಲ್ಲಿ ನಿರ್ಮಿಸಲಾದ ಕಟ್ಟಡಗಳು.
• ಪಂಚಾಯತಿ ಆಸ್ತಿಗಳು: ಜಿಲ್ಲಾ, ತಾಲ್ಲೂಕು ಮತ್ತು ಗ್ರಾಮ ಪಂಚಾಯತಿಗಳಿಗೆ ಸೇರಿದ ಕಟ್ಟಡಗಳು ಹಾಗೂ ಖಾಲಿ ನಿವೇಶನಗಳು.
• ಧರ್ಮಾರ್ಥ ಮತ್ತು ಉಚಿತ ಸಂಸ್ಥೆಗಳು: ಇಂಡಿಯನ್ ಟ್ರಸ್ಟ್ ಆಕ್ಟ್ 1882 ಅಥವಾ ಕರ್ನಾಟಕ ಹಿಂದೂ ಧಾರ್ಮಿಕ ಸಂಸ್ಥೆಗಳ ಕಾಯ್ದೆ 1997ರಡಿ ನೋಂದಾಯಿತವಾಗಿರುವ ಮತ್ತು ಆದಾಯ ತೆರಿಗೆ ವಿನಾಯಿತಿ (11 ಮತ್ತು 80ಜಿ) ಹೊಂದಿರುವ ಸಂಸ್ಥೆಗಳು ನಡೆಸುವ:
  • ಸಂಪೂರ್ಣ ಉಚಿತವಾಗಿ ನಡೆಸಲ್ಪಡುವ ಆಸ್ಪತ್ರೆಗಳು.
  • ವಿದ್ಯಾರ್ಥಿಗಳಿಂದಾಗಲಿ, ಪೋಷಕರಿಂದಾಗಲಿ ಯಾವುದೇ ಶುಲ್ಕ ಪಡೆಯದ ಉಚಿತ ಶಿಕ್ಷಣ ಸಂಸ್ಥೆಗಳು.
  • ಅನಾಥಾಶ್ರಮಗಳು, ವೃದ್ಧಾಶ್ರಮಗಳು, ವಿಶೇಷ ಚೇತನರ ನಿಲಯಗಳು/ಶಾಲೆಗಳು, ನಿರ್ಗತಿಕ ಮಹಿಳೆಯರ ಆಶ್ರಯ ತಾಣಗಳು ಮತ್ತು ಸರ್ಕಾರದ ಅಂಗೀಕೃತ ಜನೋಪಕಾರಿ ಸಂಸ್ಥೆಗಳು.
  ಗಮನಿಸಿ: ಈ ಧರ್ಮಾರ್ಥ ಸಂಸ್ಥೆಗಳು ಬಾಡಿಗೆಗೆ ನೀಡಿದ ಅಥವಾ ವಾಣಿಜ್ಯ ಉದ್ದೇಶಕ್ಕಾಗಿ ಬಳಸುವ ಕಟ್ಟಡಗಳು ಹಾಗೂ ಖಾಲಿ ಜಾಗಗಳು ಕಡ್ಡಾಯವಾಗಿ ತೆರಿಗೆ ವ್ಯಾಪ್ತಿಗೆ ಒಳಪಡುತ್ತವೆ.
• ಪೂಜಾ ಸ್ಥಳಗಳು: ಸಾರ್ವಜನಿಕ ಪೂಜಾ ಸ್ಥಳವಾಗಿ ಬಳಸಲ್ಪಡುತ್ತಿರುವ, ಯಾವುದೇ ಲಾಭಾಂಶವಿಲ್ಲದ ಧಾರ್ಮಿಕ ಸ್ಥಳಗಳು.
• ಹಸಿರೀಕರಣ ಪ್ರದೇಶಗಳು: ಕೈಗಾರಿಕೆ ಹಾಗೂ ವಿಮಾನ ನಿಲ್ದಾಣ ಪ್ರಾಧಿಕಾರಗಳ ವ್ಯಾಪ್ತಿಯ ಖಾಲಿ ಜಾಗಗಳಲ್ಲಿ ಬೆಳೆಸಿರುವ ನೆಡುತೋಪು/ಹಸಿರೀಕರಣ (ಲ್ಯಾಂಡ್‌ಸ್ಕೇಪ್) ಪ್ರದೇಶಗಳು.
• ನವೀಕರಿಸಬಹುದಾದ ಇಂಧನ ಘಟಕದ ಭೂಮಿ:ನವೀಕರಿಸಬಹುದಾದ ಇಂಧನ ಘಟಕಕ್ಕಾಗಿ ಗುತ್ತಿಗೆಗೆ ಪಡೆದ, ಉಪಯೋಗಿಸದೆ ಇರುವ ಖಾಲಿ ಜಮೀನುಗಳು.

2.ಶೇಕಡಾವಾರು ತೆರಿಗೆ ವಿನಾಯಿತಿಗಳು (ರಿಯಾಯಿತಿಗಳು)

ವಿವಿಧ ವರ್ಗದ ಆಸ್ತಿ ಮಾಲೀಕರಿಗೆ ನಿಯಮಾನುಸಾರ ತೆರಿಗೆಯಲ್ಲಿ ರಿಯಾಯಿತಿ ಇರುತ್ತದೆ (ಯಾವುದೇ ಒಂದು ಸ್ವತ್ತಿಗೆ ಗರಿಷ್ಠ ಒಂದು ವಿನಾಯಿತಿ ಮಾತ್ರ ಅನ್ವಯಿಸುತ್ತದೆ):

• ಶೇ. 50% ವಿನಾಯಿತಿ ವಾಸದ ಮನೆಗಳಿಗೆ: ಸೈನಿಕರು, ಮಾಜಿ ಸೈನಿಕರು, ಸೈನಿಕರ ವಿಧವೆಯರು, ವಿಶೇಷ ಚೇತನರು, ವಿಧವೆಯರು, ಹೆಚ್.ಐ.ವಿ (ಏಡ್ಸ್) ಮತ್ತು ಕುಷ್ಠರೋಗ ಪೀಡಿತ ಮಾಲೀಕರ ಸ್ವಂತ ವಾಸದ ಮನೆಗಳಿಗೆ.
• ಶೇ. 50% ವಿನಾಯಿತಿ ಉದ್ಯಮಗಳಿಗೆ: ಸರ್ಕಾರದ ಯೋಜನೆಗಳಡಿ ನೋಂದಾಯಿತ ಮಹಿಳಾ ಸ್ವ-ಸಹಾಯ ಸಂಘಗಳು/ಒಕ್ಕೂಟಗಳು ಮತ್ತು ವಿಶೇಷ ಚೇತನರು ನಡೆಸುವ ಸಣ್ಣ ವಾಣಿಜ್ಯ/ಉದ್ಯಮ ಘಟಕಗಳಿಗೆ.
• ಶೇ. 30% ವಿನಾಯಿತಿ APMC ಪ್ರಾಂಗಣ: ಸ್ವಯಂ ನಿರ್ವಹಣೆಯ ನಾಗರಿಕ ಸೌಲಭ್ಯಗಳಾದ ನೀರು, ತ್ಯಾಜ್ಯ (ಘನ/ದ್ರವ) ನಿರ್ವಹಣೆ ಹೊಂದಿರುವ APMC ಪ್ರಾಂಗಣದ ಆಸ್ತಿಗಳಿಗೆ.
• ಶೇ. 25% ಸೇವಾ ಶುಲ್ಕ ಸರ್ಕಾರಿ ಕಟ್ಟಡಗಳು: ಕೇಂದ್ರ/ರಾಜ್ಯ ಸರ್ಕಾರಕ್ಕೆ ಸೇರಿದ ಕಟ್ಟಡಗಳು ಅಥವಾ ಖಾಲಿ ನಿವೇಶನಗಳಿಗೆ (ಪ್ರಾಥಮಿಕ/ಪ್ರೌಢಶಾಲೆ, ಅಂಗನವಾಡಿ ಹೊರತುಪಡಿಸಿ) ಒಟ್ಟು ತೆರಿಗೆಯ ಶೇ. 25 ರಷ್ಟು ಮಾತ್ರ ಸೇವಾ ಶುಲ್ಕ ವಿಧಿಸಲಾಗುತ್ತದೆ.
• ಶೇ. 15% ವಿನಾಯಿತಿ ವಸತಿ ಸಮುಚ್ಚಯಗಳು: ನೀರು, ಕಸದ ನಿರ್ವಹಣೆ, ಸೋಲಾರ್ ಬೀದಿ ದೀಪ ವ್ಯವಸ್ಥೆಯನ್ನು ಸ್ವತಃ ಹೊಂದಿರುವ ಅಪಾರ್ಟ್‌ಮೆಂಟ್, ಗೇಟೆಡ್ ಕಮ್ಯುನಿಟಿ, ವಿಲ್ಲಾ ಮುಂತಾದ ಬಹು ಮಾಲೀಕತ್ವದ ಆಸ್ತಿಗಳಿಗೆ.
• ಶೇ. 5% ವಿನಾಯಿತಿ ಮುಂಗಡ ಪಾವತಿ: ಆರ್ಥಿಕ ವರ್ಷ ಪ್ರಾರಂಭವಾದ 3 ತಿಂಗಳ ಒಳಗಾಗಿ ಆ ವರ್ಷದ ಸಂಪೂರ್ಣ ತೆರಿಗೆ ಪಾವತಿಸುವವರಿಗೆ.

3. ವಿಶೇಷ ತೆರಿಗೆ ನಿಯಮಗಳು (ಗೃಹ ಕೈಗಾರಿಕೆ ಮತ್ತು ಹೋಮ್-ಸ್ಟೇ)

• ಗೃಹ ಕೈಗಾರಿಕೆಗಳು: ವಾಸದ ಮನೆಯಲ್ಲಿ ನಡೆಸುವ ಕೈಮಗ್ಗ, ಗುಡಿ ಕೈಗಾರಿಕೆ, ಕೃಷಿ ಆಧಾರಿತ ಚಟುವಟಿಕೆಗಳಿಗೆ ವಾಣಿಜ್ಯ ದರದ ಬದಲು ವಸತಿ ಕಟ್ಟಡದ ದರದಲ್ಲೇ ತೆರಿಗೆ ಇರುತ್ತದೆ.
• ಹೋಮ್-ಸ್ಟೇ (Home-Stay): ಪ್ರವಾಸೋದ್ಯಮ ಇಲಾಖೆಯ ನೀತಿಯ ಅವಧಿಯಲ್ಲಿ ಹೋಮ್-ಸ್ಟೇಗಳಿಗೆ ವಸತಿ ದರದಲ್ಲೇ ತೆರಿಗೆ ಇರುತ್ತದೆ. ಆದರೆ, ಮಾಲೀಕರು ಅಲ್ಲಿ ವಾಸವಿರದೆ ಏಜೆಂಟರ ಮೂಲಕ ನಡೆಸುತ್ತಿದ್ದರೆ ಅದನ್ನು 'Bed and Breakfast' ಎಂದು ಪರಿಗಣಿಸಿ ವಾಣಿಜ್ಯ ದರದಲ್ಲಿ ತೆರಿಗೆ ವಿಧಿಸಲಾಗುತ್ತದೆ.

4. ತೆರಿಗೆ ಆಕ್ಷೇಪಣೆ ಮತ್ತು ಮೇಲ್ಮನವಿ ಸಲ್ಲಿಸುವ ವಿಧಾನ

ವಿಧಿಸಲಾದ ತೆರಿಗೆ ಅಥವಾ ಶುಲ್ಕದ ಬಗ್ಗೆ ತಕರಾರಿದ್ದರೆ ಈ ಕೆಳಗಿನ ಕ್ರಮ ಅನುಸರಿಸಬೇಕು:

1

ಠೇವಣಿ: ಮೊದಲು ನಿಗದಿಪಡಿಸಿದ ತೆರಿಗೆ/ಫೀಜಿನ ಶೇ. 50 ರಷ್ಟು ಮೊತ್ತವನ್ನು ಗ್ರಾಮ ಪಂಚಾಯತಿಗೆ ಕಡ್ಡಾಯವಾಗಿ ಠೇವಣಿ ಇಡಬೇಕು.

2

ತಾಲ್ಲೂಕು ಮಟ್ಟ: ನಂತರ ತಾಲೂಕು ಪಂಚಾಯತಿಯ ಕಾರ್ಯನಿರ್ವಾಹಕ ಅಧಿಕಾರಿಗೆ (EO) ಮೇಲ್ಮನವಿ ಸಲ್ಲಿಸಬೇಕು. ಇವರು 30 ದಿನಗಳೊಳಗೆ ವಿಚಾರಣೆ ನಡೆಸಿ ಆದೇಶ ನೀಡುತ್ತಾರೆ.

3

ಜಿಲ್ಲಾ ಮಟ್ಟ: ಈ ಆದೇಶಕ್ಕೆ ತೃಪ್ತಿ ಇಲ್ಲದಿದ್ದರೆ, 30 ದಿನಗಳೊಳಗೆ ಜಿಲ್ಲಾ ಪಂಚಾಯತಿಯ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗೆ (CEO) ಮೇಲ್ಮನವಿ ಸಲ್ಲಿಸಬಹುದು. ಇವರ ತೀರ್ಮಾನವೇ ಅಂತಿಮ.

5. ಆಸ್ತಿ ವಿವರಗಳ ವಹಿಯಲ್ಲಿ ಬದಲಾವಣೆ (ಮ್ಯುಟೇಷನ್ / ಖಾತೆ ಬದಲಾವಣೆ)

ಗ್ರಾಮ ಪಂಚಾಯತಿಯ ಆಸ್ತಿ ದಾಖಲೆಗಳಲ್ಲಿ ಕೆಳಗಿನ ಸಂದರ್ಭಗಳಲ್ಲಿ ಬದಲಾವಣೆ ಮಾಡಲು ಅವಕಾಶವಿದೆ:

• ಆಸ್ತಿ ವಿಭಜನೆ, ಕ್ರಯಪತ್ರ (Sale Deed), ದಾನಪತ್ರ (Gift Deed), ವಿಲ್, ರಿಲೀಸ್ ಡೀಡ್, ಕೋರ್ಟ್ ಆದೇಶ ಅಥವಾ ಬ್ಯಾಂಕ್ ಹರಾಜಿನ ಮೂಲಕ ಮಾಲೀಕತ್ವ, ಅಳತೆ ಬದಲಾದಾಗ.
• ಆಸ್ತಿ ವಹಿಯಲ್ಲಿ ವಿವರಗಳು ತಪ್ಪಾಗಿ ದಾಖಲಾಗಿದ್ದು ತಿದ್ದುಪಡಿ ಅಥವಾ ರದ್ದು ಮಾಡಬೇಕಾದಾಗ.
• ಹೊಸದಾಗಿ ಕಟ್ಟಡ ನಿರ್ಮಿಸಿದಾಗ, ಪುನರ್ ನಿರ್ಮಿಸಿದಾಗ ಅಥವಾ ವಿಸ್ತರಿಸಿದಾಗ.
• ಮೃತರಾದ ಮಾಲೀಕರ ಕಾನೂನುಬದ್ಧ ವಾರಸುದಾರರ ಹೆಸರನ್ನು ಸೇರಿಸಬೇಕಾದಾಗ.

ಬದಲಾವಣೆಯ ವಿಧಾನ: ನೋಂದಾಯಿತ ಪತ್ರಗಳ ಬದಲಾವಣೆ ಹೊರತುಪಡಿಸಿ ಉಳಿದವುಗಳಿಗೆ ಪಂಚಾಯತಿಗೆ ಅರ್ಜಿ ಸಲ್ಲಿಸಬೇಕು. ಅರ್ಜಿ ಬಂದ ನಂತರ ಸಾರ್ವಜನಿಕ ಆಕ್ಷೇಪಣೆಗಾಗಿ ಪಂಚಾಯತಿ ನೋಟಿಸ್ ಬೋರ್ಡ್‌ನಲ್ಲಿ 7 ದಿನಗಳ ನೋಟಿಸ್ ಪ್ರಕಟಿಸಲಾಗುತ್ತದೆ.

ಆಸ್ತಿಯ ಮಾಲೀಕರಿಗೆ ಆಸ್ತಿಯ ತೆರಿಗೆ ವಿವರಗಳನ್ನೊಳಗೊಂಡ ನಮೂನೆ-11ಎ ಮತ್ತು 11ಬಿಯ ಉದ್ಧೃತ ಭಾಗವನ್ನು ಆನ್‌ಲೈನ್ ತಂತ್ರಾಂಶದ (Software) ಮೂಲಕವೇ ನೀಡಲಾಗುತ್ತದೆ.